శ్రీ లక్ష్మీ ఎడ్యుకేషనల్ చారిటబుల్ ట్రస్ట్ మరియు సంతోష్ ఫిలిమ్స్ సంయుక్త ఆధ్వర్యంలో హైదరాబాద్లోని తెలుగు ఫిలిం చాంబర్ ఆఫ్ కామర్స్లో శనివారం నిర్వహించిన సాంస్కృతిక కార్యక్రమం ఘన విజయవంతమైంది.
భారతీయ సంస్కృతి, దేశభక్తి విలువలను ప్రతిబింబించే “వందేమాతరం ఫ్రేమ్స్” జాతీయ లఘుచిత్ర పోటీలో భాగంగా సంతోష్ ఫిలిమ్స్ రూపొందించిన “అభినవ్” లఘుచిత్రం ప్రత్యేక ప్రివ్యూను ఈ సందర్భంగా ప్రదర్శించారు. ఈ లఘుచిత్రం ప్రేక్షకులను విశేషంగా ఆకట్టుకుని ప్రశంసలు అందుకుంది.
కేంద్ర సాంస్కృతిక మంత్రిత్వ శాఖ నుంచి ప్రశంసాపత్రం అందుకున్న టీం లీడర్ భీమగాని సుధాకర్ గౌడ్ను మాజీ మంత్రివర్యులు డాక్టర్ విరసనోల్ల శ్రీనివాస్ గౌడ్ ఘనంగా అభినందించారు. దేశభక్తి, సంస్కృతి పరిరక్షణ అంశాలను ప్రోత్సహించే సృజనాత్మక కార్యక్రమాల్లో ఆయన చేస్తున్న కృషిని కొనియాడారు.
అనంతరం ప్రజాసేవా రంగంలో విశిష్ట సేవలందిస్తున్న డాక్టర్ శ్రీనివాస్ గౌడ్కు నిర్వాహకులు ప్రత్యేక సన్మానం నిర్వహించారు. ఈ సందర్భంగా పలువురు ప్రముఖులు మాట్లాడుతూ భారతీయ సంస్కృతి పరిరక్షణ, యువతలో జాతీయ చైతన్యం పెంపొందించడం, దేశభక్తి భావనలను బలోపేతం చేయడం వంటి అంశాల ప్రాముఖ్యతను వివరించారు.
కార్యక్రమంలో జరిగిన ప్రసంగాలు సభికులను ఆలోచింపజేయగా, ముగింపులో ప్రదర్శించిన “అభినవ్” లఘుచిత్రం ప్రేక్షకుల నుంచి విశేష స్పందనను అందుకుంది. లఘుచిత్రంలోని సందేశాత్మక కథనం, దేశభక్తి భావాలు మరియు సాంకేతిక నైపుణ్యానికి పలువురు ప్రశంసలు కురిపించారు.
ఈ కార్యక్రమంలో సినీ, సాంస్కృతిక, సామాజిక రంగాలకు చెందిన పలువురు ప్రముఖులు, కళాకారులు, యువత మరియు ప్రేక్షకులు పెద్ద సంఖ్యలో పాల్గొన్నారు.
