తెలంగాణ సైకాలజిస్ట్ అసోసియేషన్ మేడ్చల్ జిల్లా అధ్యక్షుడు, ప్రముఖ మనస్తత్వవేత్త మరియు సినీ దర్శకుడు రాజ్ ఆచార్య, హర్యానా మాజీ గవర్నర్ శ్రీ బండారు దత్తాత్రేయ గారి చేతుల మీదుగా “దశాబ్ది సేవా పురస్కారాన్ని” అందుకున్నారు. తెలంగాణ సైకాలజిస్ట్ అసోసియేషన్ దశాబ్ది ఉత్సవాల సందర్భంగా ఆయనకు ఈ గౌరవం దక్కింది.
ఈ సందర్భంగా రాజ్ ఆచార్య మాట్లాడుతూ, సమాజ శ్రేయస్సు కోసం మనస్తత్వవేత్తలు తమ వృత్తిపరమైన నైపుణ్యాలను నిరంతరం పెంపొందించుకోవాలని పిలుపునిచ్చారు. ప్రస్తుతం ప్రతి రంగంలోనూ మనస్తత్వ సేవల అవసరం ఎంతో ఉందని, అయితే ప్రభుత్వం ఇంకా మనస్తత్వవేత్తల సేవలను పూర్తిస్థాయిలో గుర్తించి వినియోగించుకోవాల్సి ఉందని ఆయన అభిప్రాయపడ్డారు.
తెలంగాణలో మనస్తత్వ నిపుణులకు మెరుగైన వృత్తిపరమైన అవకాశాలు మరియు ఉపాధి కల్పించే లక్ష్యంతో, ప్రత్యేకంగా ఒక “స్టేట్ కౌన్సిల్” ఏర్పాటు కోసం కృషి చేస్తున్న అసోసియేషన్ వ్యవస్థాపక అధ్యక్షులు డాక్టర్ ముత్కూరి రామచందర్ గారి ప్రయత్నాలను ఈ సందర్భంగా ఆయన అభినందించారు.
సమాజంలో ఎదురవుతున్న ఆత్మహత్యలు, హత్యలు, గృహ హింస, యువత వ్యసనాలకు బానిస కావడం వంటి తీవ్రమైన సమస్యలను అరికట్టడంలో మనస్తత్వవేత్తల పాత్ర అత్యంత కీలకమని రాజ్ ఆచార్య పేర్కొన్నారు. సమాజంలో నిత్యం జరుగుతున్న కలచివేసే సంఘటనలను విశ్లేషించి, వాటికి సరైన పరిష్కారాలను మరియు మార్గదర్శకత్వాన్ని మనస్తత్వవేత్తలు అందించగలరని ఆయన తెలిపారు.
యువ మనస్తత్వవేత్తలు మరియు సైకాలజీ విద్యార్థులు తెలంగాణ సైకాలజిస్ట్ అసోసియేషన్లో సభ్యత్వం తీసుకోవాలని, సంస్థ నిర్వహించే అవగాహన కార్యక్రమాల్లో చురుగ్గా పాల్గొనాలని ఆయన కోరారు. అసోసియేషన్లో చేరడానికి ఆసక్తి ఉన్నవారు 9059958271 నంబరులో రాజ్ ఆచార్యను సంప్రదించవచ్చు.
